Sierra de Gabardón


Sierra de Gabardón dende Matidero, lau de Guarguera.

A sierra de Gabardón, que bella vez se troba como "de Galardón" (pienso que por error de transcripción u trafuque con ixa parabra castellana) ye una sierra entre Sarrablo y Sobrarbe, en as sierras interiors pirinencas, con a ralla en sentiu este-oeste que traza alto u baixo a divisoria d'auguas entre a Ribera de Fiscal y a cuenca d'o río Ara en norte, y as valles de Sarrablo en sur.

Ye en a cabecera d'as valles de Basa y de Guarga (a Guarguera), afluents d'o Galligo, y por o sur plega a achuntar-se con a sierra d'Aineto a traviés d'o puerto de Sarrablo, deixando a l'este as cubetas aon naixe os ríos Alcanadre y Balcetz/Isuala.

En o sector norte, la ralla que forma y que sirve pa despartir a cuenca de l'Ara y a de Basa se continúa con a sierra de Canciás sin que i haiga un puesto concreto aon se pueda decir ésta ye la una y ixo ye l'atra, por o que tamién se troba a veces (más que más en toponimia oficial) como "sierra de Canciás-Galardón" u "macizo Canciás-Galardón". Por l'ueste la desepara d'a sierra de Picardiello como una tallada lo barranco de Chillué.

As suyas mayors alturas son o Gabardón de 1767 metros, a punta Napinals con 1803 metros, y a Penyarrueba (se pronuncia "peñarruaba") de 1683 metros.



No hay comentarios:

Publicar un comentario

Destacaus

Cambol/Campol

Cambol dende a costera de barranco As Gargantas.   Cambol u Campol ye uno d'os lugars más altos de A Solana, y tamién os más grans, p...

Dentradas populars