Sant Miguel

(1) Sant Miguel Arcánchel de Ruesta.

L'Arcánchel Miguel ("San Miguel" en a grafía de 1987) ye una d'as figuras protectoras por antonomasia en a cultura chudeo-cristiana. En a Ilesia Catolica, Sant Miguel se considera o protector d'a ilesia y os cristians, figura que pariz que s'habría recuperau en as zaguerías d'a Edat Media, pos en os primers sieglos de cristianismo se nombraba a una zarpada de santos guardas antes que a él.

En l'Alto Aragón nos topamos con a difusión d'o culto a Sant Miguel con especial interés a partir d'os sieglos XV y XVI, que coincide con una expansión demografica n'o Reino y con a preocupación manifiesta de qualques autoridatz eclesiasticas de que pervivisen ritos y creyencias fuera de dogma oficial, más que más en os vericuetos más alpartaus.

(2) S. Miguel d'Otal

Por ixo ye que principian a aparecer templos a la suya advocación a partir d'ixe momento, y tamién representacions artisticas d'este santo con alas. O santo ye cabal en a vida d'aquella sociedat por principal ganadera, u la suya fiesta se fa coincidir a-esprés con días sinyaleros en l'anyada. Ye o vintinueve de setiembre.

Miguel no ye un santo qualsiquiera, ye o cheneral d'os exércitos celestials en as tres relichions monoteístas. D'aquí o papel protector. Un defensor d'o bien contra o mal, y se sole representar victorioso con un dragón u bel demonio a los pietz, bella arma en una mano: espada u lanza, y armadura militar por vestiu.

Una balanza pa sopesar as almas puede fer parte de l'equipo, y no ye raro que o demonio alargue a zarpa pa mirar-se de decantar o chudicio.

A Sanmigalada:

A "Sanmigalada" son as semanas d'antes de o día de Sant Miguel (29 de setiembre) y as d'en pasau o día, en as que se concentra l'actividat de ferias ganaderas y s'esviella o ciclo anyal de l'actividat agropecuaria.

Pa la fiesta de Sant Miguel s'afirmaba tamién os criaus, se pagaba la Iguala de medicos y practicantes, y no pocas vodas se negociaría tamién pa ixa fiesta.

Os pastors y o servicio domestico s'afirmaba tamién pa Sant Miguel. En pasando toda l'anyada de servicio se podeba cambiar quan llegaba la sanmigalada siguient, de forma que si l'amo heba estau preto u lo treballador malo podeban no tornar a afirmar-se a l'atro anyo.

Esto nos charra d'una relación diferent, puestar que favorecida por a Ilesia, a que tiene o santo y o mundo ganadero. Sant Miguel ye o santo protector d'os cristians contra las fuerzas escuras, pero en ye en particular d'os pastors y ganaderos d'a montanya, que cada anyo fan a transuancia ta Tierra Plana.

En pasando a Sanmigalada, son feitos os treballos de verano como a siega, a trilla y a siembra y ye l'hora d'aprestar-se pa l'hibierno. Os amos baixarán as canaulas d'a falsa, embatallarán as esquillas y quartizos, y marcharán a replegar o ganau d'os puertos. Luego estará l'hora de marchar.

Fotos:

1. Sant Miguel Arcánchel. Olio sobre tabla 1510-1515. Procede d'a ilesia parroquial de Ruesta. Museu Diocesano de Chaca. Licencia: CC-Reconocimiento-NoComercial-CompartirIgual. Atribución: Juan R. Lascorz.
2. Sant Miguel Arcánchel. Olio sobre tabla 1510-1520. Procede d'a ilesia parroquial de Sant Miguel d'Otal. Museu Diocesano de Chaca.  Licencia: CC-Reconocimiento-NoComercial-CompartirIgual. Atribución: Juan R. Lascorz.