Sarrablo


Envista parcial d'o Sarrablo de Sobrarbe dende o Mesón d'Albars (T.M. de Boltanya), envista ta sudeste. O fondo son as sierras de Sebil (izquierda) y Guara (dreita) y o tozal de Surta en o centro, que ye una buega con Viello Sobrarbe d'esta parte.

O Sarrablo, que en castellano en dicen Serrablo, ye una comarca natural entre as Sierras Interiors y as Exteriors pirinencas. Como o suyo nombre fa pensar, tiene una cheografía agreste dominada por sierras, sarratos y barrancos fondos. I son comprendidas diferents valles y valletas y tamién tierras altas entre 1000 y 1500 metros, ubiertas cara ta'l sud y sufiertas con as aireras y o sol. A tierra ye poco fonda por muitos puestos y o terreno feba poco pa meter-lo en cultura. A mayoría d'asentamientos, chiquinins, gosan estar an ye la tierra u, como ye tan tipico d'este Pirineu nuestro; en bel carasol con as espaldas bien guardadas contra l'Aire de Puerto.

Anque o suyo nombre ha quedau ligau con o romanico que s'estendilla por buena cosa de l'Alto Galligo, a verdat ye que o Sarrablo, tal como lo entendeba la tradición, cubre una extensión más ampla que se prolarga por buen trozo d'os municipios de Saminyanigo, Boltanya, l'Aínsa-Sobrarbe, Biarche y Nueno. Ixo ye, entre as comarcas oficials de l'Alto Galligo (a más gran parte), Sobrarbe, en Semontano de Balbastro y Plana Uesca.

Torrulluela de la Plana, despoblau de Sarrablo que pertenece a Boltanya.

Asinas, o Sarrablo comprende o territorio que se troba aproximadament en norte d'a sierra de Guara, a o sud d'o río Ara y a sierra de Gabardón, a l'este d'o río Galligo y a l'ueste d'a sierra de Sevil y Mondiniero. Xavier Tomás, en o suyo libro sobre l'aragonés d'a comarca vecina (El Aragonés de Biello Sobrarbe. Instituto de Estudios Altoaragoneses, 1999) describe o tozal de Surta como una buega sinyera pa os habitants d'estes lugars entre a comarca aquella y Sarrablo, lo que alto u baixo s'achusta con esta descripción.

O Sarrablo ye o puesto an que naixen diferents ríos que marchan de camín enta os grans cursos d'augua de la provincia, debuixando trazaus radials dende as tierras altas centrals d'esta comarca y o puerto de Sarrablo. D'estos en naixe en o corazón de Sarrablo:
  • A Guarga. 
  • O Guatizalema.
  • L'Alcanadre.
  • A Isuala, que antes d'arribar en o parache d'os Estrechos se diz barranco u río Balcetz (cast. Balced u Balcés)
  • O Barranco de Mascún, que como o Balcetz ye mui freqüentau por barranquistas y practicants d'esportes d'aventura.
Valle de Guarga u "Guarguera" dende os arredols de Matidero (2011). Esta valle se repobló con pins entre os anyos 1941 y 1971 y por ixo la veyemos plena de selva y no solo que a clapas, como sí que se'n veye más por a versant sobrarbenca d'o puerto de Sarrablo.

En una concepción ampla de Sarrablo, comprende tamién a parte alta d'a valle de Nocito y a valle de Guarga u "Guarguera".  Bella vez se troba tamién mesa Saminyanigo, Sobrepuerto y mesmo lugars de Tierra Biescas, pero yo estoi que ye un poco influido por a definción de romanico sarrablés y tot lo que pillan as ilesias d'ixe estilo y m'estimo más considerar ixas como comarcas diferenciadas en lo cheografico y cultural.

Eclesiasticament, a más gran parte de parroquias de Sarrablo son de lo bispau de Chaca (arciprestato de Saminyanigo) y namás As Billostas y Bagüeste con as suyas aldeyas (Sant Póliz y Letosa) son de lo bispau de Uesca (arciprestato de Semontano-Sobrarbe).

No hay comentarios:

Publicar un comentario

Destacaus

Cambol/Campol

Cambol dende a costera de barranco As Gargantas.   Cambol u Campol ye uno d'os lugars más altos de A Solana, y tamién os más grans, p...

Dentradas populars