Cambol/Campol

Cambol dende a costera de barranco As Gargantas.
 

Cambol u Campol ye uno d'os lugars más altos de A Solana, y tamién os más grans, pos arribó a tener 7 casas ubiertas y más de cinquanta habitantes enantes de a Guerra, quedando poco t'atrás de Burgasé que ejerceba como capital de distrito y de toda la valle. Se comenzó a despoblar a poco a poco en rematau o conflicto, pa quedar vuedo a primeras d'es anyos 1960 en que se vendió a tierra a l'ICONA, como toda la Solana.

Cambol/Campol dende a pie de pista Yeba
Cambol/Campol dende pie de pista. Os fustes prestos pa llevar d'alguno.

O toponimo aragonés sufre vacilacions, como tantos atros casos, entre a pronunciación plana y l'aguda (Cámpol/Campol), y tamién en a sonorización de a P dimpués de M (Campol/Cambol), anque ya veiremos que n'esto puede que i haiga más miga.

L'antigua masada de Sant Martín de Puitarás y a Ribera d'Ara en Chanovas, dende Cambol

 

O casar de Cambol ye bien plantau en l'alto d'un cerro d'os que fan a falda d'a Celata y a sierra de Nabaín, as que zarran d'esta mano A Solana y la acancillan contra la valle' Vio. Ye á 1071 metros d'altura, con una envista que pa qué sobre sobre a Ribera d'Ara, que le queda espuesta chusto adebant, y sobre as crepazas que, a lau y lau y con l'ayuda d'os siglos, i han fendito os barrancos de Sansuelo y de As Gargantas. 

Por ixa situación debió d'estar un puesto privilegiau sobre a cabanyera que yiba dende os Semontanos y Tierra Plana enta las estivas más altas d'estas valles. Hoi día a pista que puya ta Yeba i pasa por a costau suyo, por lo qual pa llegar con o coche no ye complicau.

Cambol en a historia

Historicamente, Cambol fue lugar cabecero de os atros lugarichons que i hai en a costera d'esta orilla d'a Guarga Burgasé. Agrupaba baixo a suya parroquia y distrito escolar a las aldeyetas de Puyuelo (3 casas), Villamana (2 casas) y Sant Felices (2 casas más). Tamién le perteneceba á Cambol a gran casa de Sant Martín de Puitarás, que ye n'a misma loma más t'abaixo.

A primer mención de Cambol a tenemos en 1250(1). Mencions diferents nos dan nombres como Campola, Campoll, Canipol...(1)

 

En octubre de 1559 lo visitador don Pedro Vitales yera en A Solana inspecionando as parroquias en nombre d'o bispe de Uesca.(2) Gracias a él tenemos a imagen d'una parroquia puestar que rica entre lo que gosaba estar a redolada, con una ilesia bien abastida y con bell obcheto suntuario como no se'n heba visto guaires en as aldeas:

Die decimo sexto mensis Octobris anno qua supra Dnus. Visitator visitavit ecclesiam loci de Campol et primo Sanctissimum, quod invenit in tabernaculo clauso in capsa eburnea, deposita intus ea capsa argentea, sub tribus formis decenter reconditum. Deinde visitavit fontem baptismalem et invenit ea sin coraça.

Ixo ye, un sagrario fecho de vori y dentro d'él unatra caixeta de plata, objetos ricos pa la epoca. Alavez y ya en romance nos describe don Vitales os vestuajes que o mosén teneba pa oficiar:

[...] tres vestimentos: el uno, de rasso morado con çeneffa; el otro de fustán blanco bergada con afforro de tela negra, almaticas albas, una cruz pital de alatón viejo, dos missales: uno de los antiguos y el otro de los pequenyos. [...]

 



Con tot esto sabemos que Cambol, si más no se'n puet saber, lo menos teneba lo que aparenta la tercera ilesia más rica de A Solana, poquet a la zaga de Burgasé y de La Vililla que yeran as de millor dote. No podemos saber qué pasó dimpués, pero o lugar actual no se pariz guaire a lo que dixa entrefilar don Vitales quan nos charra d'aquella parroquia, ni tampoco a aquelatro nuclio pubrismo que se trobará Madoz en o siglo XIX.

Cambol seguntes Madoz:

Ya en o siglo XIX, Pascual Madoz(3) replega quatro cosetas sobre Cambol que nos sirven pa fer-nos una idea de cómo estaba la vida astí alto en tiempos más apegatos.

Madoz esplica que o termino de Cambol tiene un «terreno quebrado» y de mala calidat, onque la situación de as casas tan alteras fa de millor ventilar y ye esposau a os aires. («Buena era pa trillar, pero a casa sin garba»). Tamién replega lo menudo que yera o cabal d'es barrancos locals, que por temporadas no lievaban ni gota d'augua y feban que no se podese fer regano si que en bell gortichón, abaixo en os campetz que i habeba, a costau mismo d'o barranco. Esta misma tonica, de huertos minimos y enfaixonaus a canto un barranco que quan creceba lo mismo brincaban con l'augua, la trobamos en a memoria viva d'os zaguers habitantes por toda La Solana.

Nos informa tamién de cómo se comunicaba o país: Os camins yeran malos en ixe siglo, mantenitos a vecinal como ye regular por toda la montanya. I habeba pontarrons u palancas pa pasar os barrancos, fechos de normal con madera. O correu lo recibiban en Boltanya, t'an que teneban que ir porque no i habeba cartero. 

En 1845 no i habeba árbols. Ara i son hasta dentro o lugar.

A economía de tot esto habría d'estar pobre, pos regular que n'estaría. Y dura. No teneban garra tierras planas y a demba de lugar yera fecha de bancals como aún hoi se puede vier. L'agricultura local produciba de cerials; trigo y cebata, bella verdura, y trunfas en a huerta. No teneban guaires ganaus y no se conoceba garra industria. En ixa epoca a filatura de lana yera un recurso bien socorriu que teneban os habitantes de lugars ganaderos pa complementar a economía, pero no en charra ni parola por o que a lo menos no le paricería a Madoz que en Cambol estase cosa destacable. Por comercio no feban si que bella truca con atros nuclios vecinos, segunt Madoz.(3)

O monte yera pobre, sin selva. Un paisache bien diferent de lo que i podemos vier hoi. Feban lenya de as matas y de bell par de caixicos seguntes se desprende d'a obra de o cheografo navarro. A caza no adubiba si que pa bella perdiz.
 
"5 vecinos, 30 almas" ye como Madoz remata la dentrada dedicata a Cambol, lo que nos da 6 almas por vecino, que ixo ye, cada casa.
 

 A ilesia

A ilesia de Cambol se dedica a Santa Marina, una santa que tamién cuenta con atras advocacions en a redolada. Feba d'ilesia parroquial pa Cambol y pa las tres aldeas: Villamana, Puyuelo y Sant Felices y a más a masada de Sant Martín, anque dimpués cada un d'ixos lugars teneba una ilesieta local en a qual tansament s'ofreceba servicios.


Ilesia parroquial de Santa Marina, Cambol.
Ye en metat o lugar, anque por alto d'ella y dica la pista o que más i hai son bordas y as casas son por o costau d'abaixo. Dende o calcil d'a torre ranca la unica y estreta carrera de Cambol, a lau y lau d'a qual son as casas.

Una atra vez a Vitales acudimos pa que nos proporcione un inventario d'os obchetos suntuarios que se podeba trobar uno en a ilesia de Cambol aquel anyo 1559, y no son poca cosa:(2)

[...] Y visitó el altar mayor y encontró en él una lápida, tres lineas, corporales, verba-consacrationis, [...] un fagistolico, un caliz bueno, un manual viejo, una arquilla con unos corporales, unos ençenseros, un portapaz, dos candeleros, vinaxeras, una calderica, un escanyo. En el coro, tres libros de pergamino viejo, un psalterio, un antiphonero, un proçessionario. En el campanal nuebo, hay en él quatro campanas: dos grandes y dos pequenyas, una campanilla de la sagra, un çirio pasqual y unos hostieros.[...]

Alavez, como fa con todas as ilesias, l'ilustre visitador episcopal emite unas quantas instruccions d'arreglos y reformas que cal fer en o templo, y pa o caso d'a parroquial de Cambol son:

Lo que se ha de hazer en el dicho lugar de Campol: Primo, porque el altar mayor es muy alto, mandamos se haga un pie de altar de madera de un palmo de alto o como conviniera, un delantealtar de guadamaçil y una cruz de plata y que se repare la yglesia y se çierren los agujeros que hay detrás del altar y dicha reparaçion de la yglesia sea hecha para Navidad, so pena de L sueldos. Item que se saque la pila de baptizar de dentro o medio de la yglesia y se ponga en un rincón della, donde estuviere más comoda, y se haga cobertor o coraça y bassos, y el almario para las crismeras sea heho para Pasqua de Ressurrection proxime veniente, so pena de L sueldos. Item mandamos que se ponga çerraja con su llave para Todos los Sanctos y, si no, se suma el Santissimo Sacramento.

Altar mayor.

A ilesia n'a suya forma actual ye una construcción fecha dimpués de a visita de Pedro Vitales, en o sieglo XVII.(4)

Ye un templo d'estilo popular, con testero plano y nau rectangular con cubierta con vuelta de lunetos. A puerta ye lateral, con portalada de suportal con vuelta fecha de tosca y enlucida. 

A nau tiene dos capillas laterals intercomunicadas, con dos altars menors. As capillas bezonas que s'habría d'esperar en o costau d'epistola no i son (son cegadas).

O coro se situaba n'os pies d'a nau principal pero lo sustituyón por una capilla más gran que fizo de batisterio. A pila baltismera la tenemos insertada en una capilleta chusto adebant d'a puerta.

A torre campanal de tres alturas que en a base se lebanta sobre lo que fue o coro. En 2013 o campanal teneba tresbatida ya la cubierta y amenazaba ruina.

 

Capilla lateral
Tot lo conchunto ye decorau con pintura mural sobre as parez enlucidas en blanco. A pintura ye d'estilo popular y con predominio de colors ocres y royos, sacando l'altar que ye azulete. Esta pintura, mismo si no s'aparenta antigua, como en tantas ilesias de despoblaus se malmete a-escape y bien luego no se va a conocer.

Una peana insertada n'a paret, n'a cabecera, nos diz que i habeba presidente una figura de santo u santa. Como no estigo aquí pa pensar mal, diré que tamién debió pillar o montante y emigró.

Toponimia

D'este toponimo se puede dar, lo menos, tres variantes aragonesas con vitalidat prou buena n'os arredols. Yo, como pa meter por escrito lo nombre en teneba que triar una a la fuerza, he pillau «Cambol», pero bien s'hese valito qualsiquiera d'as atras y seguido tos esplico por qué:

A parla tradicional de A Solana se circunscribe a l'ambito de l'aragonés central, como toda la comarca de Sobrarbe. Uno d'os rasgos d'o conchunto dialectal central ye una tendencia a la sonorización d'as consonantes oclusivas quan van chusto a l'arreo d'una nasal (M/N). Esto produce duplos de parablas alofonas que son cambiables en a lengua charrada: Frontón/frondón, puente/puande, campo/cambo... o rasgo este tiene un epicentro historico aon que fue en especial potente y que va, si fa u no fa, chusto dende a linia imaginaria de A Solana y valle' Vio, en Sobrarbe, dica la valle' Tena en a comarca vecina de l'Alto Galligo (anque tamién i hai bel ejemplo fuera d'ixa zona). Alavez s'esplica uno la equivalencia entre «Cambol» y «Campol».

Cambol, «puesto de paso», dende Sant Felices, a l'atro canto lo barranco Sansuelo. 
Dimpués tamién s'ha de parar cuenta con a etimolochía. I hai dos teorías: la una nos explica la posible baixada de «Campol» dende o latín «CAMPUS», campo. Alavez paricería lógico pensar que ixa forma con P habría d'estar a principal, tal como la trobamos en os documentos escritos, y que l'atra (Cambol) no ye si que una variación secundaria y más tardana que dimana d'ella. Pero tiene un problema la teoría: si una cosa le falta a Cambol son amplas estensions de tierra plana, ixo ye: campos. Tot i son a lo más faixetas ¡y bien estretas!

Pero i hai unatra teoría, la que fa venir o toponimo d'a radiz celta «kamb-bol», que significaría «paso principal».(1) Y no hemos dito antes que o lugar ye chusto n'una d'as cabanyeras tradicionals que puyan dende o río Ara dica valle' Vio, que ye l'acceso enta las estivas? Pos bueno. Ixo creigo yo.


Fiestas

As fiestas de Cambol yeran pa la Natividat de la Virgen, que se celebra l'ocho de setiembre. Sabemos que se feba baile en a placeta d'a escuela, y que soleban achuntar-se ixe día con os que puyaban dende Puyuelo, Villamana, Sant Felices y Sant Martín pa la ocasión.

A escuela de Cambol chugaba un papel como puesto de reunión social pa las Fiestas.

As casas:

As casas de Cambol yeran seis pa mediaus d'o siglo XX, quan s'escomenzó o proceso d'expropiación. Por orden de o patrimonio que teneban a expropiar, de mayor á menor, yeran: Casa Ezquerra, casa Antón López, casa Martín Périz, casa Sánchez y casa Sixto.(5)

A despoblación:
Dende a falsa dica o patio, ferida de muerte n'una casa.

Cambol fue afectau subsidiario d'o prochecto de pantano de Chanovas, como tamién os atros lugars de A Solana. Todas as casas, as bordas, quadras y uebras s'expropión en os anyos 1960 y pasón a fer parte d'o Patrimonio Forestal del Estado (más tarde l'ICONA). L'interés yera de repoblar con pins royos y pino crabero toda la valle, de manera que a plevia no arrocegás buro contra l'embalse y prolargar-le a vida útil á la obra.

A la contra de como en atros lugars pasó, en A Solana fuen os vicinos os que le ofreción a l'Administración que les comprás o patrimonio y no a la inversa. Manimenos, l'adquisición final fue por un importe á-saber quánto más baixo de lo que ellos demandaban: 1.178.000 ptas en total(5), prou menos que a mitat de lo que demandaban.

As negociacions entre os inchenieros y os propietarios durón buena cosa d'aquella decada, dende o primer ofrecimiento de 1961, dica 1967 que por fin se satisfación as cantidaz.

Os puestos t'an que emigrón os antiguos habitantes, d'acuerdo con Carlos Tarazona(5), fuen: o lugar de colonización de San Lorenzo del Flumen (Monegros) dos casas, ta Barcelona una casa, y en ta Barbastro unatra casa. Una casa más  (Martín Périz) que viviban aúno en Cambol en comenzau l'anyo 1970, y una zaguera casa d'a qual se pierde o rastro.


Biblio y webografía

(1) MIGUEL BALLESTÍN, Pascual. Toponimia Mayor de Aragón; Ciudades, villas, lugares, aldeas, ríos, montañas y territorios. Zaragoza, 2015. ISBN 978-84-8094-070-2

(2) CONTE OLIVEROS, Jesús. Viaje por Pueblos Oscenses, siglo XVI. Tomo I - Año 1559.  Zaragoza, 1980. ISBN 84-7078-098-0

(3) MADOZ, Pascual. Diccionario Geográfico-estadístico-histórico de España y sus posesiones de Ultramar. 1850.

(4) Iglesia de Santa Marina, en o sistema d'información de patrimonio SIPCA

(5) TARAZONA GRASA, Carlos. Pinos y Penas. Repoblación forestal y Despoblación en Huesca. Bartolo edizions, 2019. ISBN 978-84-09-09745-6.

·LAGLERA BAILO, Cristian. Despoblados de Huesca, Tomo 3. Sobrarbe y Somontano. Editorial Pirineo. 2015. ISBN 978-84-96972-47-6.

Pa qui se l'haiga quedau a forniguilla de saber más:

-Cámpol en o blog Despoblados en Huesca.

No hay comentarios:

Publicar un comentario

Destacaus

Cambol/Campol

Cambol dende a costera de barranco As Gargantas.   Cambol u Campol ye uno d'os lugars más altos de A Solana, y tamién os más grans, p...

Dentradas populars