Torrulluela d'o Vico

Torrulluela d'o Vico u de lo Vico

Torrulluela d'o Vico, pronunciau /toruˈʎwala/ ("Torrulluála"), ye un lugar de Sarrablo que pertenece a o municipio de Boltanya. En o termino municipal d'esta villa de Sobrarbe en i hai dos con ixe nombre: L'atra ye Torrulluela d'a Plana, a un poquet más de 2 km por buen camino d'esta. En a redolada a las dos les deciban de conchunta "As Torrulluelas".

Debiu a las caracteristicas de l'aragonés de Sarrablo, ye probable que antes y fa no guaire se decise Torrulluela de lo Vico, sin a contración de l'articlo que ye un fenomeno relativament choven en aragonés. Esta variant explicaría o toponimo oficial en castellano, Torrolluala del Obico. O filologo Chusé Raúl Usón diz en Toponimia del Municipio de Boltaña (Xordica, 2019) que o lugar podría haber-se dito "O Vico (de Torrulluala)" en primeras, transformau dimpués en "Torrulluala d'o Vico".

Y qué ye un Vico? Pos Vico viene d'o latín <VICUS que ye o nombre que se le daba a una traza de poblamiento rural disperso, una aldea. Ye una parabra que ha dau tamién atros toponimos conoixius, como a ciudat de Vigo en Galicia u Vic en Catalunya.

Como Torrulluela d'a Plana, ye en as falderas d'a sierra de Gabardón que miran ta la cuenca alta d'o río Balcetz, a o sur d'o puerto de Sarrablo, en o corazón d'a comarca tradicional de Sarrablo. Una zona an que totz os lugars son despoblaus.

Situación:

Casas dende dezaga, fueras d'o lugar.

As dos Torrulluelas son en sendos sarratos que baixan dende a sierra de Gabardón, no guaire luenyes d'o puerto de Sarrablo. O terreno ye aspro por esta parte y a tierra poco productiva, pos no i abunda las extensions que se podese meter en cultura y quasi tot ye suelo poco profundo entre terreros y leneras varias.

O lugar en si aprofita un puesto una miquina de más cantimplano en a baixant d'un d'estes cerros, o que le permite tener totz os edificios alto u baixo a la mesma altaria, a lo largo d'una sola carrera. Tamién s'entrefila una demba de cambos arredol d'as casas que s'ha guardau ubiertos y sin broza gracias a os ganaus que belún be de venir a fer paixentar d'esta parte.

A ilesia ye chiquirrina y ye en un d'os cabos de lugar, en o más meridional. Ye feita enruenas como toda la resta de lugar sacando bella borda que encara ye cubillada.

Casas:

Casa Javierre (primer termino) y casa Cebollero (dezaga)

As casas de Torrulluela d'o Vico yeran quatro: casa Cebollero, casa Javierre, casa Sampietro y casa Sánchez. As quatro son en a mesma carrera, y a que se conserva millor ye casa Cebollero en haber-se quedau deshabitada la zaguera.

 O lugar s'habitaba hasta os anyos 1960. As diferents familias emprendión o camino en direccions diferents.

Como ta esta parte de Sarrablo no i plegón os plans de reforestación d'os anyos 1950 y 1960, as casa no fuen vendidas a l'Estau como sí que gosó pasar en atros lugars en a vecina Guarguera. Esto significa que as casas que nos alcontremos tienen propietarios particulars: no son abandonadas.

Casa Cebollero teneba un molino de farina en o barranco, que ye o que feban marchar os vecinos d'este lugar y de Torrulluela d'a Plana, que i veniban pa fer a suya molienda tamién. En pagas, Torrulluela d'o Vico no tiene escuela y os zagals teneban que marchar ta l'atra Torrulluela pa recibir as clases.

Parez que casa Cebollero debeba tener bella cosa de preeminencia sobre as de demás pos buena cosa d'as construccions auxiliars d'este lugar fuen d'ellos. Explica Jesús Cardiel en o suyo libro que son acreditaus como infanzons en as Cortz de Balbastro en 1626 y que, mui probablemente, Torrulluela d'o Vico ye o lugar d'aon dimanó este linache noble que luego s'embrecaría con atras casas fuertes de Viello Sobrarbe, Ribera de Fiscal y valle de Solana.

Ilesia:

A ilesia de Torrulluela d'o Vico y a 'Buddleia' en flor.

A ilesia de Torrulluela ye consagrada a Sant Andrés, que a más ye lo patrón de lugar, y la trobaremos en o cabo suroeste d'os casars.

Ye un templo d'aparienza modesta, con un campanal que tansament pasa t'alto lo lenau. A cubierta interior ye toda estalapizada y a runa fa difícil marchar por adentro.

Parez que debeba tener dos capilletas laterals chicorronas, mui en concordancia con as modas constructivas d'os sieglos XVI-XVII n'esta parte d'o Pirineu. Tamién tiene un coro n'alto.

A torre ye de tres pisos anque baixos cada uno. O cimenterio ye anexo y debeba estar zarrau como un patio con paso obligau por un portal, de lo qual no en queda si que os dos cantos d'a puerta. Tiene nichos en a paret chunto a la ilesia que pertenecen a beluns d'os zaguers que se quedón a descansar aquí.

A tot esto, a yo a'l costau de la ilesia me trucó la ficancia una 'Buddleia' (que ye un arbusto de jardín,  de flors finas y ulorosas), que anque estase viella y ya quasi un árbol, en a visita que fice n'a primavera de 2011 se lo montó pa ser plena de flors moradas. Ye bien curioso como qualques plantas exoticas son capaces de sobrevivir tantos anyos aon que l'hombre las plantó, mesmo si ya no tienen denguno que las cuide.

Con estos trobos tamién me meto a pensar una cosa (porque no ye la primera ni la zaguera planta ornamental que m'alcuentro, ya tos lo podetz imaginar): si como n'este caso son especies que no se reproducen, pos rai, pero para cuenta con as que sí! Por eixemplo, quántos lirios de cimenterio fuera de puesto no nos toparemos? Puestar que a'l cabo l'hombre no sía tan preciso como nos gusta pensar-nos.

Fiestas:

As fiestas patronals yeran pa o día Sant Andrés, que ye o 30 de noviembre. Faustino Calderón explica en o suyo blog que a fiesta tuvon que cambiar-la ta setiembre porque en as zaguerías de noviembre siempre feba malo. Por ixo dende bel momento se pasón a celebrar o 16 de setiembre.

A fiesta d'hibierno se feba pa Sant Fabián, santo companyero de Sant Sabastián (20 de chinero) de qualque devoción en Sarrablo y valle de Boltanya.

Historia: 

A clau de l'arco de puerta de casa Javierre.

Como con atros lugars, una primera aproximación nos la da Pascual Madoz a través d'o suyo Diccionario geográfico-estadístico de España y sus posesiones de ultramar de 1840. De Torrulluela nos da dos nombres con os que se la debeba conocer a par d'alavez; cito: Torruellola ó Torrolluala de Lobico.

Nos diz tamién que pertenece a o concello de "Valle de Serrablo, cuya capital es Secorún", que tiene cinco casas, y que ye un puesto pobre con poqueta tierra de cultura.

A chent en o sieglo XIX, seguntes Madoz, sembraba cebada y atros cerials. Os ganaus yeran de crabas y uellas por principal, y a dieta se complementaba como por quasi totz os puestos y dica no fa tantos anyos con bella cazata, que a par d'alavez no yera d'especies forestals como corresponde a una rechión sin arbolau (cal imachinar-se o Pirineu asinas), sino que se mataba perdices y conellos, y bella pesca de barbo en o río Balcetz, que Madoz cita aquí como Isuela.

Pa qui se le haiga quedau forniguilla de más:

• Los Pueblos Deshabitados (Blogspot): Torrolluala del Obico (Huesca).
• Despoblados en Huesca: Torrolluala del Obico.
• Diccionario geográfico-estadístico de Madoz: Torruellola ó Torrolluala de Lobico.
• Gobierno de Aragón: Sendero S-17 Pueyo de Morcat - Casas de Montalbán - Torruéllola de la Plana - Torrolluala del Obico (mapa).
• Casas e infanzones de Sobrarbe (Blogspot): Pardina Albás, Torrolluala de La Plana y Torrolluala de Lo Bico.

Bibliografía:

*LAGLERA BAILO, Cristian; Despoblados de Huesca (Tomo 3): Sobrarbe y Somontano. Editorial Pirineo, 2015. ISBN 978-84-96972-47-6.

* USÓN, Chusé Raúl; Toponimia del Municipio de Boltaña (Sobrarbe, Huesca). Prensas Universitarias de Zaragoza + Xordica Editorial. Zaragoza, 2019. ISBN 978-84-16461-17-2

* CARDIEL LALUEZA, Jesús; Nobiliario de Sobrarbe. 2017. ISBN 978-84-697-5382-8