Torrulluela d'a Plana

Torrulluela d'a Plana en 2011.


Torrulluela d'a Plana, pronunciau /toruˈʎwala/ ("Torrulluála"), que en castellano ye rechistrau como Torruéllola de la Plana por toponimo oficial, ye un lugar de Sarrablo que se troba en o termino municipal de Boltanya y ye un d'es dos lugars con nombre de Torrulluela que i hai en o municipio: l'atro ye Torrulluela de lo Vico, a'l canto mesmo.

Antes más fizo parte d'o municipio de Laguarta/Secorún, hasta que se despartió entre Boltanya y Saminanigo en os anyos 1970, tot quedando as dos Torrulluelas en a parte de la villa de l'Ara. Como tantos ye despoblau dende chusto enantes (anyos 60).

Torrulluela ye sobre un sarrato que baixa dende as estribacions orientals d'a sierra de Gabardón, cerca d'o puerto de Sarrablo, mirando ta la cuenca alta d'o río Balcetz. A l'atro canto d'o puerto ye la valle de Guarga. Ye a arredol de dos kilometros de l'atra Torrulluela, a d'o Vico, con a que siempre ha teniu muita relación. Ye de dar que a distancia entre "As Torrulluelas" ye más larga por as vericuetas d'a pista, porque os dos son aposentaus en sendos sarratos de la mesma versant.

Teneba ocho casas arredol de dos carreras y a plaza, y a ilesia en lo alto.

Situación:

Lenaus d'a plaza y un tellau de tella (casa Borruel) en Torrulluela d'a Plana.
Torrulluela d'a Plana ye a 1113 metros d'altaria sobre una planeta más u menos cantimplana que se forma entre as faixas por debaixo d'o tozalet que domina la ilesia, n'as laderas orientals d'a sierra de Gabardón y a d'Aineto, que s'achuntan por o puerto de Sarrablo que d'esta parte desepara Sobrarbe contra l'Alto Galligo. Un atro sarrato zarra una compleguera a'l norte y l'atra a'l sur una miqueta por debaixo d'As Torrulluelas, de manera que l'augua d'esta baixant remata por plegar en a Isuela (u Balcetz) a l'este por a part de Bagüeste, entre que a d'o sur marcha dreita ta'l Mascún, aon son Sant Póliz, Letosa, Alastrué y Otín, a l'atro canto d'ixe cerro.

Esta parte de Sarrablo yera prou aislada (en o blog de F. Calderón s'explica que teneban cinco horas enta Boltanya), a buena altura, y as condicions de vida debeban ser duras. Tamién, a constitución d'o terreno n'esta baixant d'a sierras de Gabardón y Aineto, con tantos afloramientos de flysch y materials mesozoicos superficials, fan d'esta parte de Sarrablo una de mal treballar. Por ixo a población no podió estar nunca guaire numerosa.

Esta parte escapó a las campanyas de repoblación de pins que se fizo manimenos en tantismos puestos en os Pirineus, entre os anyos 1941 y principios d'os anyos 1970. Asinas ye que podemos vier pocas tacas de pinar, y por contra quasi tot lo monte ye claro u a clapas de vechetación natural, compuesto d'artos, caixicos, freixens, gabarderas, etc. que por medrar más despaciet que as coniferas de plantación son encara en estadios primerencos.

Casas:

Casa Baja.

Torrulluela d'a Plana teneba ocho casas, que son casa Baja, casa Borruel, casa Barcolino, casa Carpintero, casa Coterón, casa Grasa, casa O Militar y casa Melchor. As dos carreras d'o lugar se troban en a plaza, de traza tal que fan una L; la una, la más alta, pilla contino la pista de Torrulluela de lo Vico, y l'atra, a d'abaixo, se fa camino por o barranco y s'en va enta la pardina d'Albars y dimpués ta Las Billostas.

N'esta plaza i trobaremos casa Melchor y a escuela. A escuela ye un edificio bien particular, o contrapunto "racional", como en diría Enrique Satué, en un lugar feito de piedra y construccions esforzadas. Data d'o sieglo XX y ye un edificio d'ixos d'escuela rural que comenzarían a floreixer por estas montanyas con os plans de desarrollo d'a Segunda Republica y dimpues, pasada la Guerra, quedaría pa Escuela Nacional. Tiene dos plantas: abaixo se feba clase a os ninos que veniban d'as dos Torrulluelas y d'atros lugars d'a redolanza, y o piso d'alto yera pa vivienda d'o mayestro.

A escuela.
A zaguera casa que quedó vueda la sabemos por o libro de Cristian Laglera ("Despoblados de Huesca (Tomo 3): Sobrarbe y Somontano". Editorial Pirineo, 2015) y fue casa Barcolino, en 1965. Ye un casalicio d'excepción, construito en primerías d'o sieglo XX (1905), que ye un poco ta fuera de lugare.

Puerta de casa Coterón.

Ilesia:

A ilesia parroquial de Torrulluela yera dedicada a l'Asumpción de María. Yera un templo de buena mida, con planta rectangular y testero en cruz latina.

Ilesia de l'Asumpción (2011).

En 2011 feba ya anyos que s'heba espaldau o lenato, pero se guardaba bien l'altar mayor con pinturas murals que millor u pior se podeban atisvar, y as dos capilletas laterals.


O templo se debió construir en o sieglo XVI, que fue un sieglo d'expansión demografica en o que hue ye la provincia de Uesca, o que fizo más fácil que se renovase as ilesias medievals. A portalada, d'estilo neoclasico, tiene motilons en as jambas con figuras talladas.

A torre d'a ilesia en 2011.

A gran defeita d'esta ilesia fue la caita d'a torre, que pasó fa no guaire (2014), dimpués de que hise estau buen rabanyo d'anyadas con a cubierta que l'heba caiu t'adentro, rebentando totz os pisos y a estructura, y con una crepaza que le iba d'alto t'abaixo por a frontera que feba miedo. En as fotos que meto n'esta dentrada encara yera de piet la torre, anque se veye que amenazaba con cayer qualsiquier día.

Fiestas:

 

As fiestas patronals de Torrulluela yeran pa l'Asumpción d'a virgen, o 15 d'agosto. Tamién feban fiesta d'hibierno pa Santa Agueda, o 5 de febrero.

Tamién se celebraba:(1)
  • Sant Antón: o 17 de chinero, con birolla en casa Baja.
  • Sant Bernabé: l'11 de chunio en casa Melchor. 
Casa Borruel (izquierda) y casa Grasa (dreita).

Pa qui se le haiga quedau forniguilla:


Bibliografía:

*LAGLERA BAILO, Cristian; Despoblados de Huesca (Tomo 3): Sobrarbe y Somontano. Editorial Pirineo, 2015. ISBN 978-84-96972-47-6.

* USÓN, Chusé Raúl; Toponimia del Municipio de Boltaña (Sobrarbe, Huesca). Prensas Universitarias de Zaragoza + Xordica Editorial. Zaragoza, 2019. ISBN 978-84-16461-17-2

No hay comentarios:

Publicar un comentario

Destacaus

La Cort (de Tricás)

La Cort , que antes s'heba conociu como La Cort de Tricás y que en castellano s'escribe oficialmente « Lacort » (en chunto arti...

Dentradas populars