Semolué

 
A ilesia de Sant Salvador de Semolué ye lo unico que despunta por alto de l'arbolau.

Semolué ye un lugar d'a valle d'a Solana que, como atros en a redolada, s'expropió en os anyos 1960 pa fer repoblación de pins pa impedir a colmatación d'o pantano de Chanovas, que a la fin como sabemos no se construyó.

En l'actualidat ye en o termino municipal de Fiscal, como toda la Solana, pero n'o pasau heba estau una aldea de Caixol. Una cosa curiosa ye que quan o concello aquél se constituyó en municipio, allá por 1833, lo fizon con o nombre de Semolué, que yera o más chicorrón d'es dos lugars. Dimpués pasaría a fer parte d'o municipio de Burgasé (1), dica que tot se lo quedó lo Patrimonio Forestal de l'Estau en 1967 y quedón totz os lugars incorporaus a Fiscal.

Situación:

A valle d'a Guarga de Caixol y a sierra d'a Corona (Suerio) dende Semolué.

Semolué ye a 1214 metros d'altura (1) en a man solana d'o sarrato de Castellar, que fa d'auguapartiente entre as cuencas d'es dos ríos, u "Guargas", que tien a Solana.

O lugar mira ta la valleta d'a Guarga de Caixol, que baixa d'a sierra Corona pasando por ixe atro lugar y drena la más fonda y escura d'as d'os valles principals que forman a Solana. L'atra Guarga ye la Guarga de Burgasé, que baixa dende la que fuere capital d'esta valle, y s'achunta las dos en a glera 'la boca 'la valle, en plegando ya quasi ta l'Ara, por debaixo de Giral.

Anque Semolué no ye leixos ni de Castellar ni de Caixol (y dende cada un d'estos dos lugars i hai un caminet que pasa t'astí), la verdat ye que os árbols s'han feito tan altos que con poco que no se conozca o mont se puede fer de mal trobar.

A más, l'abundancia de maleza y en especial de hiedra fa que os edificios que se guarda en piet cuesten de vier. De traza cheneral, o que nos meterá sobre aviso de que somos cerca serán as paretz d'as marguins d'as faixetas, que onque sían plantadas de pins se conservan prou bien en os arredols de Semolué.

Si por contra l'aproximación a femos dende Castellar, que ye de baixada, puestar que veigamos a torre d'a ilesia, que anque ye vestida de hiedras amanece por alto d'a pineda de repoblación.

Por o camino de Caixol o que primero veyeremos son as enrunas de l'antigua fuent y d'un lavadero, que son en o cabo baixo de lugar.

As enrunas d'a fuent y o lavadero.

Casas:

Casa Soldau en 2012.
As casas de Semolué son tres: casa Gallán, casa Salvador y casa Soldau. Denguna ye gran, todas más bien de midas medianas, ni grans como en i hai beluna en atros lugars, ni chicas como as d'os lugars más pobres por eixemplo de valle' Vio u de Sarrablo. Esto nos charra de lo reparto d'a propiedat, sin garra amo que en acumulás a mayoría, y d'a calidat d'os medios de producción de que se disponeba: ni masa ni pocos y en tierra medianamente buena (dentro de lo que ye a montanya), un lugar aon cada casa podeba tener una trapada de uellas y crabas pa producir, un hortichón en o regano, unas faixetas de secano y bella caballería, lo que significa que con más u menos treballos as familias podeban vivir.

Son tres as casas. As que nos ha llegau dica hue, lo menos. Talmente antes en hese estau más, pos i hai edificios de mesuras parellanas, con as casas, que s'ha emplegau como quadras u como bordas, pero no tienen a traza tipica de bordas: as puertas son más chiquetas, tienen más ventanas, etc.

Ilesia:


Ilesia de S. Salvador (s. XVIII)
A ilesia de Semolué yera un templo de mesuras modestas. Yera dedicada a Sant Salvador.

Teneba planta rectangular con abside plano y dos capilletas laterals. Posiblement tamién contaba con coro elevau, pero por estar as cubiertas espaldadas dende fa tiempos se fa difícil de precisar. L'interior de la nau ye pleno de runa.

A portalada ye lateral a la nau, como pasa con tantas ilesias de Sobrarbe, con un lenato refirmau con vuelta de piedra y lenastra pa cubillar. Ye una obra popular, sinyada en 1873 si paramos cuenta a lo que ye inscrito en l'aro d'a puerta.

A torre ye de base quadrada y tres pisos d'alto, con dos uellos pa campana ubiertos ta l'este y ta'l sur, y cubierta de vuelta de forno. Ye l'edificio más altero que encara ye de piet, de manera que puede tornar-se (como me pasó a yo la primer vez) a fita vistable de tot lo lugar entre tanta selva.

A ilesia entera ye tapada por as hiedras, una especie d'enredadera que se'n tiene abundante n'este lugar.

Fiestas:

A fiesta mayor de Semolué yera o día tres d'agosto (3), día d'a Invención de Sant Isteban.

O nueve de mayo celebraban a fiesta menor, en honor a Sant Gregorio. (3)

Enruenas d'una casa en Semolué.

Atras fotos:

Borda que debe d'haber estau una casa d'antes.

Casa Salvador.

Pa qui s'haiga quedau con gana de saber más:

Fuents d'información:

  1. BERNAD, Pedro Miguel y CASTELLANOS, José Manuel. Pueblos deshabitados del Alto Aragón. Estudio de la comarca de Sobrarbe. Colegio Oficial de Arquitectos de Aragón, 1982. ISBN 84-500-8308-7
  2. INE: Alteraciones de los municipios en los Censos de Población desde 1842.
  3. LAGLERA, Cristian. Despoblados de Huesca, tomo 3: Sobrarbe - Somontano. Editorial Pirineo. Uesca, 2015. ISBN 978-84-96972-47-6

Bibliografía:

  • ACÍN FANLO, José Luis. Paisajes con memoria. Viaje a los pueblos deshabitados del Alto Aragón. PRAMES. ISBN 84-8321-202-1

Comentarios

Dentradas populars